Boradigah xeyriyyəçiləri


Onların əsas hədəfi təhsil və idmandır. Bəs gileyləri nədəndir?
Masallı rayonunun Boradigah qəsəbəsi həmişə xeyirxah işləri, dəyərli adət-ənənələrə sədaqəti ilə tanınıb. Son illərdə isə bu qəsəbədə xeyriyyəçilik ənənələrinə xüsusi diqqət verilir. Qəsəbənin ağsaqqalları, ziyalıları, gəncləri bir araya gələrək olduqca maraqlı və dəyərli xeyriyyə işlərinə imza atıblar. Bu günlərdə Boradigah xeyriyyəçilərinin ən fəal nümayəndələrindən biri - Nazim Bəyverdiyev redaksiyamızın qonağı oldu. Nazim bəy söhbətində aşağıdakı məqamlara aydınlıq gətirdi:Boradigah xeyriyyəçiləri
- Boradigah qəsəbəsində xeyriyyəçilər həmişə olub. Lakin bu iş olduqca pərakəndə halda və fasilələrlə aparılıb. Təxminən 10 il öncə qəsəbənin sayılan kişiləri - ağsaqqalı, qarasaqqalı, ziyalısı, ruhanisi, gənci... bir araya gəldi. Səylərimizi birləşdirib, bu sahədə daha sistemli bir fəaliyyət qurduq. Ən dəyərlisi isə o oldu ki, Boradigahdan kənarda -Bakıda, Moskvada və digər şəhərlərdə yaşayan boradigahlılar da səsimizə səs verdi. Beləliklə, Boradigahda xeyriyyəçilik, necə deyərlər, yeni mərhələyə qədəm qoydu. İndi ətrafımızda 300-dən yuxarı könüllü var.
İlk işlərimizdən biri şagirdlər arasında bilik yarışması, olimpiadaların təşkili oldu. Bu tədbirə Boradigah qəsəbəsi ilə yanaşı qəsəbəyə qonşu olan 10-a yaxın məktəbin şagirdləri də qoşuldu. 7 dəfə keçirilən bu yarışmanın hər birinə 2 min manata yaxın pul xərclədik, qaliblərə komputerdən, mobil telefondan tutmuş xeyli hədiyyələr bağışladıq. Daha sonra təhsillə bağlı fəaliyyətimizi başqa müstəviyə keçirtdik. Aşağı siniflər üçün könüllü dərsdənkənar kurslar təşkil edib, onların Azərbaycan, ingilis dilləri və riyaziyyatdan biliklərini təkmilləşdirdik. Bu layihəyə 80-dən artıq şagird qoşuldu. Mexanizm belə idi ki, xeyriyyəçilər müəllimlərə yardım edir, onlar da istedadlı, eləcə də imkansız ailədən olan uşaqların burada biliklərinin yüksəlməsinə yardımçı olurlar. Bundan əlavə 500-dən artıq bal toplayan şagirdlərin mənzil haqqına, kommunal xərclərinə vəsait ayırır, istedadları mükafatlandırırıq. Bunlar təhsillə bağlı gördüyümüz işlərin bir qismidir.
- Qəsəbə gənclərinin futbola sonsuz marağını nəzərə alıb qəsəbənin futbol komandasını təşkil etdik. AFFA-nın həvəskarlar Liqasında oynamaq hüququ qazandıq. Boradigah xeyriyyəçiləriBütün çətinliklərə baxmayaraq hələ ki, komandanı saxlaya bilirik. Futbolçular təmənnasız oynayır. Sadəcə komandanın illik üzvlük haqqını, geyim, səfərlər zamanı yol, yemək xərcini və sair ayrı-ayrı xeyriyyəçilərimiz ödəyir. Xatırladaq ki, bu liqada cənub rayonlarından cəmi 3 komanda var –Yardımlının, Ərkivanın və Boradigah qəsəbəsinin komandaları. Biz qısa müddətdə yarımfinal mərhələsinə qədər yüksələ bilmişik.
- Ən əsası isə odur ki, biz bu işi hərtərəfli və sistemli aparırıq. Belə ki, xeyriyyəçilərin köməyi ilə qəsəbədə uşaq futbol məktəbi də yaratmışıq. Məşqçilərə biz yardımçı olsaq da, AFFA-da uşaq futbol məktəbinin geyiminə, avadanlığına və sairə yardımçı olur. Onu da xatırladım ki, Boradigah uşaq futbol məktəbə qısa müddətdə Xəzər-Lənkəranın uşaq futbol məktəbinə 10 bacarıqlı gənc verib.
- İdmanla bağlı digər işlərimizdən biri də qəsəbədəki gənclər üçün güləş məktəbinin təşkilidir ki, imkansız ailələrin uşaqları burada tam pulsuz olaraq güləşin sirlərini öyrənir, ölkə miqyaslı yarışlarda yüksək nəticələr əldə edirlər.Boradigah xeyriyyəçiləri
- İşlərimiz təkcə bununla bitmir. Biz narkomaniyaya qarşı mübarizə ilə bağlı bir neçə aksiya keçirmişik, insanların sağlamlığına yönəli xeyli işlər görmüşük və görəcəyik
İşlərimiz əsasən 3 istiqamətdə qururuq.
1. Cədvəl üzrə olan işlər. Hansı ki, hər ay idmana, təhsilə və sairə yardımlar edirik.
2. Qəfil hadisələr - kiminsə evi yanıb,Boradigah xeyriyyəçiləri qəzaya düşüb və sair bədbəxtliklə üzləşib. Yaxud, qəsəbə üçün ciddi problem yaranıb, onu həll edirik. Məsələn, ötən il Boradigahın içindən keçən çay xeyli çirklənmişdi, üfunətdən ətrafda dayanmaq olmurdu. Bunu yoluna qoymağa qərar verdik. Bu işdə rəhmətlik Maşallah Kərimov, indiki su idarəsinin müdiri Ağabəy Ağayev çağırışımıza səs verdi. Texnikanın yanacağına, fəhlələrin yeməyinə və digər texniki işlərə isə biz yardımçı olduq və məsələ uğurla həllini tapdı.
Təbii ki, imkansızlara, xəstələrə yardımlar da unudulmayıb.
3. Qəsəbənin nüfuzlu sakinlərinin imkanlarından istifadə edib həmin işləri yoluna qoyuruq. Məsələn, ötən il bir imkansızın uşağının müalicəsi üçün xeyli vəsait tələb olunurdun. Qəsəbə ziyalısı, jurnalist olan bir həmyerlimiz öz nüfuzundan istifadə edib müalicə xərcini 1000 manata qədər azaltdı. Mən burada Boradigah xeyriyyəçilərindən çoxunun adını sadalaya bilərəm. Lakin onların əksəriyyəti ardıcıl xeyriyyəçilik etsələr də, adlarının açıqlanmasını istəmirlər.
Biz gördüyümüz bütün işlərdə aşkarlığa və ədalətliliyə xüsusi diqqət yetiririk. Başlıca məramımız odur ki, gənclərimiz sağlam böyüsün, ruhən işıqlı olsun, mövhumata qurşanmasın, kitabı sevsin, inamlı olsunlar. Bilsinlər ki, hər vaxt istedadların, çətin durumla üzləşənlərin yanındayıq.
Qarşıda görəcəyimiz işlər az deyil. İstəyirik gənclərin musiqi tərbiyəsinə yardımçı olaq, xeyriyyə marafonları, eləcə də xeyriyyə konsertləri təşkil edək. Qəsəbədə özəl uşaq bağçası yaratmaq da tədbirlərimiz sırasındadır.
Bütün bu işlərdə daim yardımçı olduqlarına görə rayon icra hakimiyyətinə, qəsəbə bələdiyyəsinə və qəsəbə icra nümayəndəsinə, rayonun bir sıra əlaqədar təşkilatlarına minnətdarıq. Lakin 2 gileyimiz də var.Boradigah xeyriyyəçiləri Boradigah qəsəbəsində 2 il öncə gözəl idman kompleksi tikilib. Dəyəri milyon manatdan artıqdır. Təntənəli açılışı da olub. Sadəcə cüzi işlər qalıb, görülsün ki, sakinlərin istifadəsinə verilsin. Lakin bu edilmir. Xatırladım ki, bu kompleksdə mini futboldan tutmuş, voleybol, həndbol, yüngül atletika və sair üçün hər cür imkan var. Lakin bu kompleksi inşa edən Alternativ Enerji Mənbələri təşkilatı onu sona çatdırmır.
Bundan əlavə dişlə-dırnaqla futbol komandası yaratsaq da, stadionumuz yoxdur, qəsəbənin örüş yerindən stadion kimi istifadə edirik.
Bu problemlərin həllində bizə yardımçı olsalar, çox şad olarıq.
Zahir Əmənov
Qeyd: Yaxın vaxtlarda Ərkivan qəsəbəsindəki xeyriyyəçilərin də fəaliyyəti barədə sizə yazı təqdim edəcəyik. Digər qəsəbə və kəndlərin də bu sahədə maraqlı təcrübəsi varsa, onlara da yer ayıra bilərik.R4suloffR4suloff

OXUNMA SAYI :3709

PAYLAŞ
Digər Xəbərlər
Gündəm
Hüquq-Kriminal
ELANLAR
Facebook Səhifəmiz
CenubXeberleri.com © 2o1o-2o17 - Bütün Hüquqlar Qorunur.
- Hazırladı Tural Rasuloff